म्रिति । मृतायेदम् । ‘अर्थेन नित्यसमासः’ (२.१.३६) । तच्च तदहश्च । ‘तस्याहः’ इति वा । ‘राजाह-’ (५.४.९१) इति टच् । तदहे प्रेतदिने । देहादूर्ध्वम् । ऊर्ध्वदेहः । राजदन्तादिः (२.२.३१) । ऊर्ध्वदेहे भवम् । अध्यात्मादित्वात् (वा० ४.३.६०) ठञ् । अनुशतिकादित्वात् । (७.३.२०) उभयपदवृद्धिः । केचिदुत्तरपदवृद्धिं नेच्छन्ति ॥ प्रेतमुद्दिश्य मरणदिनमारभ्य सपिण्डीकरणपर्यन्तं प्रत्यहं दीयमानस्य जलपिण्डादेरेकम् । ‘तदहर्दानम्’ इति पाठे तु समासान्तविधेरनित्यत्वान्न टच् ॥