लुलेति । लुडति पङ्के । ‘लुड संश्लेषे' (तु० प० से०) । ‘इगुपध-' (३.१.१३५) इति कः । डलयोरेकत्वम् । आप्नोति । ‘आप्लृ व्याप्तौ' (स्वा० प० अ०) । अच् (३.१.१३४) । लुलश्चासावापश्च । यद्वा लुड्यन्ते । ‘लुड विलोडने’ भिदाद्यङ् (३.३.१०४) । लुला विलोडिता आपोयेन । ‘लुल विमर्दने इति सौत्रो धातुर्वा ॥ (‘लुलायः' इति) अन्त:स्थयकारान्तपाठे बाहुलकादायङ्प्रत्ययः । -‘लुलिकुलिकषिभ्य आय:' इति मुकुटलिखितसूत्रमुज्ज्वलदत्तादिषु न पश्यामः । यद्वा अयते । अय गतौ (भ्वा० आ० से०) । अच् (३.१.१३४) । लुलश्वासावयश्च ॥