अग्रे हायनमस्या: । मार्गशीर्षमारभ्य वर्षप्रवृत्तेः । प्रज्ञाद्यण् ( ५.४३८) । पूर्वपदात्-' (८.४.३) इति णत्वम् । आग्रहायणी पौर्णमासी । तद्योगान्नक्षत्रमपि तथा । यत्तु-आग्रहायण्यश्वत्थाट्ठक्' (४.२.२२) इति निर्देशात्स्वार्थेऽण् । गौरादित्वात् (४.१.४१) ङीष् । अणन्तत्वादेव ङीपि सिद्धे गौरादिषु पाठोऽस्य पुंवद्भावनिषेधार्थः । तेनाग्रहायणीभार्य इति सिध्यति–इति मुकुटः । तन्न । अपसिद्धान्तात् । न हि गौरादित्वं पुंवद्भावप्रतिषेधार्थम्, किं तु ङीष्विधानार्थम् । न च पाठसामर्थ्यम् । तस्य स्वरभेदार्थत्वात् । न चोदात्तनिवृत्तिस्वरेण तदभावः पाठसामर्थ्यादुदात्तनिवृत्तिस्वरस्यैव बाधसम्भवात् । अस्य गौरादिकत्वमप्रामाणिकमिति सुवचत्वाच्च ।