सायिति । सीरं धरति । ‘धृञ् धारणे’ (भ्वा० उ० अ०) । मूलविभुजादिकः (वा० ३.२.५) । बाहुलकान्मुक् । सीरंन्ध्रस्येयम् । ‘तस्येदम्’ (४.३.१२१) इत्यण् । शिल्पकरणात् कर्षकस्त्रीव यद्वा स्वैरं स्वाच्छन्द्यं धरति । प्राग्वत् कः । पृषोदरादिः । (६.३.१०९) । गौरादिः (४.१.४१) । ‘सैरन्ध्री परवेश्मस्थशिल्पकृत्स्ववशस्त्रियाम्’ इति दन्त्यादौ रभसः । ‘चतुःषष्टिकलाभिज्ञा । शीलरूपादिसेविनी । प्रसाधनोपचारज्ञा सैरन्ध्री परिकीर्तिता’ । इति कात्यः । (‘सैरिन्ध्री’ इति) इकारमध्यपाठे पृषोदरादित्वं (६.३.१०९) बोध्यम् ॥