क्रोशति । क्रुश आह्वाने' (भ्वा० प० से०) । सितनि-' (उ० १.६९) इति तुन् । ‘स्त्रियां च' (७.१.९६) इति तृज्वत् । ‘ऋन्नेभ्यो डीप्’ (४.१.५) । मुकुटस्तु — ष्ट्रनि षित्त्वान् ङीप् – इत्याह । 'क्रोष्टी शृगालिकाकृष्णविदारीलाङ्गलीषु च' (इति मेदिनी) ॥ चत्वारि कृष्णभूकूष्माण्डस्य । मुकुटस्तुशुक्लस्य इत्याह । तन्न । ‘कृष्णविदारी' इति मेदिनीविरोधात् । एतेन-वा सिता शुक्ला – इत्यपास्तम् । ‘या असिता' इति छेत्तुमुचितत्वात् । स्वामी तु–विदार्यादित्रयं पठित्वा ‘कृष्णो भूकूष्माण्डोऽयं प्राक्षु देशेषु' इत्युक्त्वा ‘क्रोष्ट्री तु या सिता' इति पठित्वा ‘शुक्लो भूकूष्माण्डः' इत्युक्त्वा 'अन्या क्षीरबिदारी-‘इति त्रयं पपाठ । तत्र विभागत्रयमनुचितम् । उक्तमेदिनीविरोधात् ।