सेति । चतुर्दशीयोगाद्दृष्टचन्द्रा सती सा अमा सिनीवाली । एन विष्णुना सह वर्तते सा लक्ष्मीः । तद्योगात् । सिनी चन्द्रकला । व्रीह्यादित्वात् (५.२.११६) इनि: । सिनीं वलति धारयति । कर्मण्यण्' (३.२.१) यत्तु—स्त्रियाः पुंवत्-’ (६.३.३४) इति न पुंवत्वम् । ‘संज्ञापूरण्योश्च' (६.३.३८) इति निषेधात् इति मुकुटः । तन्न । सिनीवालीत्यत्र सामानाधिकरण्याभावात्, असंज्ञात्वात्, अभाषितपुंस्कत्वाच्च । यदपिसिनी चन्द्रकला सा बालाल्पात्र-इति तेन विगृहीतम् । तदपि न । बालेत्यस्य विशेषणत्वेन पूर्वनिपातप्रसङ्गात् । स्वामी तु—सिनी सिता बालास्त्यस्याम्-इत्याह । तन्न । पुंवद्भावप्रसङ्गात् । ('सिनी वाली तु दृष्टेन्दुकलामादुर्गयोः स्त्रियाम्') ।