अस्यैव पत्नी लोपामुद्रा । न मुदं राति । आतोऽनुप-’ (३.२.३) इति कः । लोपे धर्मलोपे अमुद्रा = हर्षं न लभते इत्यर्थः । स्वाम्युक्तेऽस्य पृषोदरादित्वे (६.३.१०९) फलं चिन्त्यम् । यत्तु-लोपयति योषितां रूपाभिमानम् । पचाद्यच् (३.१.१३४) । टाप् (४.१.४) लोपा । मुद्रयति स्रष्टुः सृष्टिमिति मुद्रा । ततः कर्मधारयः (२.१.५७) इति मुकुटेनोक्तम् । तच्चिन्त्यम् । लोपाशब्दस्यैव भाषितपुंस्कत्वात्पुंवद्भावप्रसङ्गात् । आङ्-प्रश्लेषेण वा तत्समाधेयम् ।