वक्राणीति । वञ्चन्ति । ‘वञ्चु गतौ’ (भ्वा० प० से) । ‘स्फायितश्चि- '(उ० २.१३) इति रक् । ‘न्यङ्क्वादीनां च (७.३.५३) इति कुत्वम् । ‘वक्रं पुटभेदे वक्रः कुटिले क्रूरभौमयोः’ इति हैमः । 'वक्रः शनैश्चरे पुंसि, पुटभेदे नपुंसकम् । त्रिषु क्रूरे च कुटिले’ । स्वामी तु-चक्राकारेण यान्त्यधः इति विगृह्णन् चवर्गादित्वं मन्यते । 'चक्रः कोके पुमान् क्लीबं व्रजे सैन्यरथाङ्गयोः । राष्ट्रे दम्भान्तरे कुम्भकारोपकरणास्त्रयोः । जलावर्तेऽपि’ इति चादौ मेदिनी ॥