नीयते । णीञ् प्रापणे’ (भ्वा० उ० से०) । ‘स्फायि-' (उ० २.१३) इति रक् । निर्गतं रादग्नेर्वा । ‘निरादयः-' (वा० २.२.१८) इति समासः । अग्नेरापः इति (तैत्तिरीय) श्रुतेः । निष्क्रान्तो रोऽस्मात् । 'प्रादिभ्यो धातुजस्य-’ (वा० २.२.२४) इति बहुव्रीहिः । अद्भ्योऽग्निः’ इति स्मृतेः । यत्तु-ढ्रलोपे-’ (६.३.१११) इति दीर्घेण 'नीरम्’ इति स्वामी इति मुकुटः । तन्न । नयति 'नीरम्’ इति स्वामिग्रन्थादुक्तार्थानवगमात् । निश्चयेन राति सुखम् । ‘रा दाने’ (अ० प० अ०) । आतश्चोपसर्गे (३.१.१३६) इति को वा । नीरवार्वारिनारम्' इति संसारावर्तसंमते 'नार’ इति पाठे नरस्येदम् । ’तस्येदम्' (४.३.१२०) इत्यण् । 'आपो वै नरसूनवः’ इति स्मृतेः । (नारस्तर्णकनीरयोः' इति मेदिनी) ।