तृतीया यौवनाख्या दशा सदा येषाम् । त्रिशब्दस्य तृतीयार्थता त्रिभागवत् । त्रिर्दश वा । ‘संख्ययाऽव्यया-'(२.२.२५) इति बहुव्रीहिः । ‘बहुव्रीहौ संख्येये-(५.४.७३) इति डच् । जन्मसत्ताविनाशाख्यास्तिस्रो दशा येषामिति वा । ‘त्रीन् तापान् दशन्ति ‘दंश दशने' (भ्वा० प० अ०) पचाद्यचि पृषोदरादित्वात् (६.३.१०९) न लोपः' इति राजदेवः । तन्न । उक्तविग्रहे कर्मण्यणः (३.२.१) प्रसङ्गेनाचोऽप्राप्तेः । मूलविभुजादित्वादित्येके (३.२.५ वा०) वा समाधेयम् ॥